د. باسم عباس الطيب – يكتب يوم البيئة العالمي حكاية الأرض البتربينا أوعك تقطع صفقه شجرة

في اسوداننا البيئة ما مجرد أرض وزرع ومطر البيئة هي الروح البتربينا، وهي الذاكرة البتسكن فينا، من أول حبة رمل في البادية، لحدي آخر نخلة واقفة على ضفة النيل.
في الريف السوداني، الزول ما كان يوم منفصل من بيئتو كان جزو منها. البيت من طين الأرض، السقف من قشها، اللبس من قطنها، والأكل من خيرها. حتى أدواتو البسيطة من القفة، للحصير، للسعن كلها طالعة من حضن الطبيعة.
العلم الحديث الليلة بقول لينا إنو المجتمعات البتعيش بتناغم مع بيئتها هي الأكثر استدامة واستقرار. دراسات كتيرة في مجال الاستدامة البيئية والاقتصاد الحيوي أثبتت إنو الاستخدام المحلي للموارد بدون استنزاف بقلل الفقر، وبحافظ على التوازن البيئي، وبزيد الإنتاجية على المدى الطويل.
نحن في تراثنا سبقنا الكلام دا بدون شهادات ولا مؤتمرات.
في البادية، الراعي ما بيسرح بهيمتو في نفس المكان كل يوم عشان الأرض ترتاح وتقشش.
المزارع كان يزرع ويخلي بور بيعرف متين الواطه بتشبع ومتين تعطش.
الناس ما بتقطع شجرة صغيرة يقولو ليك دي لسه بتكبر وتدي أكتر مرق ورصاص.
حتى في الدين ربنا قال ولا تفسدوا في الأرض بعد إصلاحها
والنبي ﷺ قال ما من مسلم يغرس غرسًا أو يزرع زرعًا فيأكل منه طير أو إنسان أو بهيمة إلا كان له به صدقة.”
دي ما بس دعوة للزراعة دي دعوة للحفاظ على البيئه.
وفي أغاني الحقيبة والدوبيت، تلقى الأرض حاضرة يا نخلة في العالي صابرة على الريح
النخلة هنا ما شجرة ساي رمز للصبر والجذور.
وفي أمثالنا: الفي الأرض بزيد
يعني الخير البتديهو الأرض بيرجع ليك أضعاف لو حافظت عليها.
لكن الحاصل الليلة في خطر.
قطع الأشجار الجائر، التصحر، الإهمال دا كلّو بخلّي الأرض تتعب. وتقارير علمية من منظمات زي الفاو (FAO) وبرنامج الأمم المتحدة للبيئة بتأكد إنو فقدان الغطاء النباتي في أفريقيا، ومنها السودان، بزيد من الجفاف، وبيأثر مباشرة على الأمن الغذائي.
يعني الموضوع ما بس بيئة دا عيشة ناس.
الحل شنو؟
الحل ما بعيد الحل فينا
نرجع نحترم الشجرة ما نقطعها إلا لضرورة، ونزرع بدلها عشرة.
نستفيد من الموارد بدون جشع زي أجدادنا.
نعلّم أولادنا إنو البيئة ما حاجة ساكت دي حياة.
ندعم المبادرات المجتمعية المدارس، الجمعيات، المزارعين في نشر الوعي البيئي.
الدولة كمان عندها دور كبير
سياسات لحماية الغابات
دعم الزراعة المستدامة
تشجيع الصناعات المحلية المعتمدة على الموارد الطبيعية
لكن أهم حاجة الإنسان.
لو كل زول قرر يحافظ على شجرة يزرع واحدة أو حتى يمنع قطع واحدة نحن بنكون بدأنا التغيير.
أوعك تقطع صفقه شجرة لأنك يمكن تكون قطعت ظل زول، أو أمل قرية، أو نفس بكرة.
البيئة أمانة والبلد دي بتستاهل نحافظ عليها.
رسالة ليك ولي و لينا كلنا أزرع حافظ وانتمي للأرض البتديك بدون مقابل.
د. باسم عباس الطيب الامام
معهد السكر
جامعه الجزيره

Thank you for reading this post, don't forget to subscribe!