عزيزة المعراج تكتب – اسباب ظهور الطعم المر في ثمار الباذنجان ( الاسود)

ممكن ست البيت تتعب في تحديق (سلطة الاسود ) تحمير وتوم وصلصة ودكوة  وما تقصر وبعد ده الناس ما تأكلها  ليه ؟؟!

Thank you for reading this post, don't forget to subscribe!

لانه في واحدة ولا اتنين من ثمار الاسود دي طعمها كان مر او لاذع وده بيخرب الطبخة تماما ويخلي طعمها غير مستساغ وطبعا باذنجان مر يعني قيمة تسويقية متدنية  وبالتالي خسارة مضمونة.
طيب شنو البيخلي طعم ثمار الباذنجان مر ؟ الجواب ببساطة أنه  الطعم المر في ثمار الباذنجان بينتج عن مادة (السولانين) القلوية  ، ودي مادة  بتتراكم في ثمار الباذنجان لعدة اسباب من اهمها :
– عدم انتظام الري والتعطيش الشديد وكمان ارتفاع ملوحة اوقلوية التربة، ده  يؤدي الى اجهاد النبات وضعف النمو الخضري، وظهور الطعم المر بالثمار.
– تالت سبب  سبب هو نقص عنصري البورون والكالسيوم. وكمان ارتفاع درجات الحرارة الشديدة، مع تقلب درجات الحرارة بين الليل والنهار.
طبعا اصابة النباتات بالحشرات او الفطريات دي اس كل خراب في المحصول ، كمان اصابة الجذور بالنيماتودا. وفي سبب رئيسي للطعم المر هو التاخر في الحصاد  عن المواعيد المناسبة للحصاد ، ده بيزيد تراكم مادة السولانين في الثمار.
وبالتأكيد. الصفات الوراثية للصنف ليها دور كبير في طعم الثمرة .
واكيد  طبعا عدم الاهتمام بالتسميد المتوازن والمناسب  سبب من اسباب مرارة طعم الباذنجان.

طيب الحلول المقترحة للمشكلة دي  شنو ؟

 سالتني  والجواب اولا الانتظام في ري النباتات، ومن  ثم تعالج   ملوحة التربة ومويه  الري، والتسميد بالاسمدة العندها تاثير الحامضي لحل مشكلة قلوية التربة وطبعا اراضينا في الجزيرة تعتبر أراضي قلوية … والأسمدة العندها تأثير حامضي  دي غالبًا  بتكون غنية بالنيتروجين، زي  كبريتات الأمونيوم ونترات الأمونيوم، أو قد تحتوي على الكبريت أو الفوسفور.
كمان مهم جدا تزويد النباتات بعنصري البورون والبوتاسيوم اما عن طريق الرش او اضافتهم للتربة. وبرضو  التحكم في درجات الحرارة في البيوت المحمية  لحماية النباتات من الاجهاد الحراري، والتغطية بالقش في حالة الزراعات المكشوفة أو الرش الخفيف وفي فترات متقاربة لتلطيف الجو للنباتات
وطبعا  معالجة ووقاية النباتات من الاصابة بالآفات ده شئ  اساسي .
اهم حاجة  القيام بجمع المحصول في الوقت المناسب، وعدم التاخر في الحصاد، عشان ما يتجه النبات لانتاج البذور، وبالتالي تراكم المادة المرة في داخل الثمار.
<وقبل كل ده لابد من  اختيار الصنف العنده الصفات الوراثية الجيدة  ومن مصدر موثوق اختى شراء البذور العشوائي ،
وطبعا الاهتمام بتوفير احتياجات النبات من العناصر الغذائية الضرورية وبشكل متوازن بمعني لا تسرف ولا تفرط

والله يعشيكم ويطرح البركة فيكم