خمة نفس-عبد الوهاب السنجك يكتب الجمعة ..نقطة ..نقطة
نقطة.. (1)
الاتحاد الأوروبي وما تناقلته بعض الوسائط.. سقط.. سقطة ما بعدها ولا قبلها.. سجلها التاريخ.. ولن يستطيع كائن من كان محوها.. قال البراؤون وقال الزعيم المجاهد السوداني القح الطيب جودة.. بالله عليكم اختشوا، ود جودة قاعد في حواشتو وحلتو بين أهلو وعشيرتو.. المليشيا المتمردة دخلت الجزيرة يعني حا يحارب بسيقان العدسية ولا القطن؟ ما لازم يجهز نفسو وأهلو ويقيف مع الجيش للقتال.. ونجح.. وانتوا يا الخواجات وعملاء السفارات.. موتوا موتكم ساااااكت.. السودان كلو جيش، والزعيم ود جودة قاعد فوق قلبكم.. تعالوا كان تقدروا.
(نقطة.. 2)
والي ولاية القضارف الفريق م. أحمد محمد أحمد حسن رمى الكرة في ملعب ولاة الولايات.. سلة رمضان مجانية للعاملين بالقضارف “لا قرش ولا تعريفة”.. نشوف الباقين حا يعملوا شنو… ما دا تحدي عديييل يا ولاة الولايات.. ونقول والي القضارف إن شاء الله في ميزان حسناتكم.
نقطة.. (3)
غابة أمبارونا المنتجع السياحي المهمل تبع منو مش معروف.. الولاية.. الثقافة والإعلام إدارة السياحة.. حماية الحياة البرية.. الغابات.. وزارة الزراعة.. محلية ود مدني الكبرى..
أخونا د. عبدالرحمن عيسى نضم وكتب وكورك عديل وبعد حا يتمرد عدييل ويدخل الغابة، لأنو ما في جهة قالت ليهو مالك يا دكتور.. قال ليكم الغابة بقت مكب للأوساخ والنفايات “كل النفايات افهموها يا ناس بالله عليكم”.. ولا حياة لمن تنادي… صم.. بكم.. مغمضي الأعين.
نقطة.. (4)
نبارك لقواتنا المسلحة والمشتركة، والبراؤون، والصياد، والكيكلاب، والعمل الخاص، وكل الذين يقاتلون دفعًا عن الوطن الانتصارات.. الدلنج دخلت الضل.. وكاودا قريبة بإذن الله تعالى.. تمشوا وين الغريق لقدّام.. أرجو الراجيكم.
نقطة.. (5)
بالأمس نفذت محكمة الجنايات العامة في ولاية الجزيرة (وسط السودان) تحت إشراف مولانا جامع علي يوسف قاضي المحكمة العامة، وحضور مولانا كمال محمد أحمد في الموقع، وحراسة أفراد الشرطة القضائية، عملية إبادة لأكثر من (5200) قندول حشيش بنقو رقمًا وعدًا.. نقول مبروك..
..وعلى الأسر مراقبة أبنائهم، مشروع الاستهداف كبير فلا بد من الانتباه.. والانتباه.
(خمة نفس)
انتخابات مهن الإنتاج الزراعي والحيواني لمشروع الجزيرة… ما بين المد والجذب.. الاتهام والانتصار.. شكاوى هنا وهناك.. أمانة حكومة الولاية تستقبل مجموعة، ومسيد أزرق طيبة يرحب بآخرين.. في شنو يا ملح الأرض.. صندوق الانتخابات هو الفيصل، “الغاية تبرر الوسيلة”.
